इस्रायली सैन्याने खान युनिस शहरामध्ये हमासच्या ठिकाणावर घातलेल्या छाप्यामध्ये मोठे घबाड जप्त केले. हमास या दहशतवादी संघटनेचे तब्बल ३ दशलक्ष शेकेल्स (इस्रायली चलन) इस्रायली सैन्याने जप्त केले आहे.
या चलनाची किंमत ८ लाख १९ हजार डॉलर इतकी आहे, असे इस्रायलच्या संरक्षण दलांनी म्हटले आहे.
खान युनिस हे गाझामधील दुसर्‍ या क्रमांकाचे शहर आहे. हमासचा म्होरक्या याह्या सिनवारचा हा बालेकिल्ला असल्याचे मानले जाते. या ठिकाणी हमासचे मोठे आर्थिक व्यवहार होत होते. हमाससाठी आंतरराष्ट्रीय चलनाची आदलाबदल देखील या ठिकाणी केली जात असल्याच्या गुप्त माहितीच्या आधारे इस्रायली सैन्याने हा छापा घातला होता. या ठिकाणी शेकेल्स, डॉलर आणि अन्य अरब देशांच्या चलनामध्ये मोठा निधी आढळून आला आहे. याशिवाय याठिकाणी आढळलेली हमासशी संबंधित काही गुप्त कागदपत्रेही जप्त करण्यात आली आहेत.
हमास आणि पॅलेस्टाईन इस्लामिक जिहाद सारख्या गटांच्या अड्ड्यांवर सापडलेली ही रोकड इस्रायलच्या संरक्षण मंत्रालयाच्या वित्त विभागाकडे जमा करण्यात येते. तेथे ही रक्कम मोजली जाऊन नंतर तिजोरीमध्ये जमा केली जाते.
अल-अमानमध्ये पॅराशूटद्वारे उतरले इस्रायली सैनिक
इस्रायली सैन्याच्या पॅरा ट्रुपर्सनी खान युनिस शहराच्या पश्‍चिमेकडील अल-अमान भागात पॅराशूनद्वारे उतरून जोरदार कारवाई केली आहे. हा भाग हमासचा गड मानला जातो. इस्रायली सैन्याने भूगर्भातील बोगदे, शस्त्रे निर्मिती सुविधा, टेहळणी पोस्ट आणि दहशतवादी कारवायांसाठी इतर पायाभूत सुविधा आढळून आल्या आहेत. येथे दहशतवाद्यांनी भूसुरुंग पेरुन ठेवले होते. इथल्या बहुतेक दहशतवाद्यांना इस्रायली सैन्याने ठार केल्याचे वृत्त आहे.