नागपूर : पतीवर वारंवार संशय घेणाऱ्या पत्नीने त्याच्यावर थेट ॲसिड हल्ला केला व त्यात पती गंभीर जखमी झाला. हुडकेश्वर पोलीस ठाण्याच्या हद्दीत ही घटना घडली असून यामुळे खळबळ उडाली आहे.
धीरज भीमराव जयपुरे (४४, विठ्ठलनगर) असे जखमी पतीचे नाव आहे. तो भाजीविक्रेता आहे. त्याचे काही वर्षांअगोदर लग्न झाले होते व पहिल्या पत्नीशी घटस्फोट झाला. त्याने तीन वर्षांअगोदर किरणसोबत (२७) दुसरे लग्न केले होते. किरणचेदेखील हे दुसरे लग्न आहे. लग्नाच्या काही महिन्यानंतरच किरण धीरजवर संशय घेऊन लागली. लहानलहान गोष्टींवरून त्यांच्यात वाद सुरू झाले व दुरावा वाढत गेला. ११ महिन्यांअगोदर ती वर्धा येथे तिच्या माहेरी गेली. धीरजने खूप विनंती करूनदेखील ती परतली नाही. अखेर धीरजने तिला नोटीस पाठवली होती. त्यामुळे ती नाराज होती. तिने अखेर घरी परत येण्याची तयारी दाखवली व १ डिसेंबर रोजी ती परतली. गुरुवारी सकाळी धीरज भाजी विकण्यासाठी घरून निघाला.
रात्री साडेआठ वाजता तो परतला व थकला असल्याने त्याने तिला चहा करायला सांगितले. त्यावेळी तो पलंगावर झोपून आपला मोबाईल पाहत होता. किरणने त्याला पलंगाच्या दुसऱ्या कडेला झोपायला सांगितले. धीरजने तसे केल्यावर अनपेक्षितपणे तिने त्याच्यावर ॲसिड फेकले. धीरजने तिला हाताने थांबवले व त्याच्या चेहऱ्याऐवजी अंगावर ॲसिड पडले. त्यात तो भाजला. त्यानंतर परत किरणने त्याच्या दिशेने ॲसिड पडले. त्याच्या डोळ्यालादेखील यात जखम झाली. वेदनेने धीरज ओरडत असताना किरणने घरातून पळ काढला. त्याच अवस्थेत धीरजने अजनी पोलीस ठाणे गाठले. पोलिसांनी त्याला वैद्यकीय उपचारांसाठी नेले. त्यानंतर हुडकेश्वर पोलीस ठाण्याच्या पथकाला माहिती देण्यात आले. धीरजच्या तक्रारीवरून किरणवर गुन्हा दाखल करण्यात आला आहे.
