ठाण्यातील मुंब्र्यातून एक धक्कादायक प्रकार समोर येत आहे. या ठिकाणी आई आणि मुलगीच्या नात्याला काळीमा फासणारी घटना घडली आहे. अघोरी कृत्यासाठी आई-वडिलांनी आपल्या 18 महिन्यांच्या मुलीला स्मशानात नेऊन तिची हत्या केल्याचा प्रकार उघडकीस आला आहे.
मुलीच्या अंगात सैतानाचा वास असल्याचे म्हणत आई-वडिलांनी हे धक्कादायक कृत्य केले आहे. या घटनेमुळे मुंब्रा हादरलं आहे. दरम्यान, या घटनेप्रकरणी चिमुकलीच्या आई-वडिलांविरुद्ध गुन्हा दाखल होत त्यांना अटक केली आहे.
पोलिसांनी दिलेलेल्या माहितीनुसार, ठाण्याजवळील मुंब्रा येथील दाम्पत्या अघोरी कृत्य करत होते. यातूनच आईने पोटच्या बाळाची हत्या केल्याची संतापजनक घटना घडली आहे. अघोरी कृत्यासाठी आई-वडिलांनी कुठलाही विचार न करता आपल्या 18 महिन्यांच्या मुलीची स्मशानात नेऊन हत्या केली. सर्वात आधी या निर्दयी दाम्पत्याने बाळाच्या अंगात सैतानाचा वास असल्याचे म्हणत बाळाला स्माशानभूमीत नेले. तेथे काही मंत्र-तंत्र म्हणत निर्दयीपणे 18 महिन्याच्या बाळाची हत्या केली.
निनावी पत्रामुळे प्रकार उघडकीस
मुंब्रा येथील हा धक्कादायक प्रकार एका निनावी पत्रामुळे उघड झाला आहे. पोलिसांना एक निनावी पत्र सापडलं होतं. या पत्राच्या आधारे पोलिसांनी तपास केला असता हा धक्कादायक प्रकार समोर आला. या प्रकरणी पोलिसांनी आरोपी आई-वडिलांना ताब्यात घेतलं. सुरुवातीला या दम्पत्याने उडवाउडवीची उत्तरे दिली. मुलीचा सांभाळ करता येत नसल्याने तिची हत्या केल्याचे सुरुवातील त्यांनी सांगितले. मात्र पोलिससांनी खोलत जावून चौकशी करत खाक्या दाखवताच दोघांनी आपला गुन्हा कबूल केला. बाळाच्या अंगात सैतान येत होता. त्यामुळे मुलीची हत्या केल्याचं त्यांनी सांगितलं.
सध्या 21 वे शतक सुरु असून मानव चंद्रावर पोहचला आहे. अशी परिस्थिती असतान देखील अंधश्रद्धा टिकून आहे. अंधश्रद्धेच्या विरोधात राज्यात कायदा देखील आहे. मात्र, या कायद्याच्या प्रभावी अंमलबजावणी अभावी आजही समाजात असे धक्कादायक अघोरी प्रकार घडत आहे. या प्रकाराचे गांभीर्य लक्षात घेत अशा प्रकरणांना आळ बसवण्यासाठी ठोस उपाययोजना करावी अशी मागणी होत आहे.